Водохранилище Вяча (Минский р-н)

**Joven** · 13.07.2026, 18:08

Увесь мінулы тыдзень жыў адзін, бо жонка з малымі з'ехала да бацькоў на лецішча. Адчуваў сябе неяк несамавіта, бо ўжо доўга не заставаўся ў адзіноце на такі працяглы час. Але ёсць і відавочныя плюсы, бо нарэшце з'явілася прастора для рыбацкай справы з амаль неабмежаваным часам.

Цяжкі выбар паміж футболам і світанкам ля вады. У пятніцу перамог футбол, бо чэмпіянат свету ўсе ж раз на чатыры гады, а рыбалка трохі часцей. Таму ў суботу прачнуўся позна, і без аніякае спешкі пачаў збірацца на Вячу. План быў прыехаць на Дафарэнцыю, правесці дзень, зачапіць пачатак ночы і вярнуцца дадому якраз да чарговага матча паміж Англіяй ды Нарвегіяй. Але ўсе сапсаваў мой сябра, які, даведаўшыся, што я на вадасховішчы, настойліва прапанаваў заставацца на ноч, бо самыя мардатыя ляшчы і ліны на Вячы, як вядома, начные.

Прабач, футбол, сення без мяне. Пагадзіўся застацца.

Сябра прывез ўсё што трэба для начной рыбалкі, але так, каб не валачы з аўто турыстычнае рыманне па некалькі разоў. Намёт не ставілі, спалі пад адкрытым небам, загарнуўшыся ў спальнік. Забягаючы наперад, аніякага дыскамфорту не адчулі, балазе дажджу ноччу не было.

Пачаў лавіць на паплавок. Да дажджу амаль не было паклевак, рэдкая плотачка на апарыша. Пасля дажджу расклаў фідар, і тая жа плотка хапала прынаду ў паўвады. Бліжэй да вечара пачаў адгукацца дробны паўлешчык на матыля, прычым, на паплавок таксама. Але мабыць я недастаткова шчодра карміў, бо пасля серый з 5-7 рыб паўлешчык сыходзіў і яго замяняў бычок.
Трохі замінала лавіць ціна, якой зараз вельмі шмат на дне вадасховішча, і даводзілася валачы вялізны ком пасля кожнага закіду фідара.

Ноччу было цікава. У мяне ўзяў невялікі прыгажун-лінок. Потым завітаў спадар карась, круглы як пятак. У сябра памер паўлешчыка стаў болей прыемны, і серыя паклевак завяршылася прыгожым ляшчом. Дзесьці да 2 гадзіны лавілі, потым пайшлі адпачываць.

Раніцай да 6 гадзіны таксама браўся паўлешчык, але пасля стала зусім глуха, і хутка мы пачалі рыхтавацца да ад'езду.
Забралі буйнейшых паўлешчыкаў на вэнджанне, ліну з карасём падзякавалі ды адпусцілі.

Такая вось цікавая, нечаканая начная рыбалка атрымалася. Вельмі спадабалася, таму будзем спрабаваць яшчэ.

**Joven** · 13.07.2026, 21:56

lynx , мабыць нейкі гібрыд з нашым родным залатым карасём. Натуральна круглы быў.

**Joven** · 17.07.2026, 13:24

Лета, летачка, лета...
Не паспелі азірнуцца, а ўжо і сонейка на зіму павярнула, і палова лета праляцела як адзін дзень. І таму вельмі хочацца ўхапіцца за такія нешматлікія ў нашым краі цёплыя дзянькі і ночы, каб правесці іх за любімай справай.
Менавіта таму літаральна праз колечкі дзён з апошняга выезду мы з сябрам вырашылі паўтарыць начную рыбалку на Вячы.
Лакацыя тая ж: Дафарэнцыя, злева ад пляжа, але гэтым разам трапілі на месца трохі бліжэй да стаянкі. Яно вельмі папулярнае ў выходныя, але ж мы прыехалі ў чацвер, таму канкурэнтаў не было.

Планавалі лавіць ноччу, таму не спяшаліся, чакалі, пакуль супакоіцца пляжная грамада, ды пойдуць адпачываць водныя матацыклісты і іншыя крыніцы празмернага (для нас) гуку.
Сябра лавіў на 2 фідара, я на 1 фідар і на 1 мах, падрыхтаваны мэтанакіравана на ліна. На фідар да ночы браўся паўлешчык рознага памеру, праскочыў адзін "амаль лешч". На мах была цішыня, драбнату адмыслова адсек, бо ставіў буйнога чарвяка, аздобленага 2-3 апарышамі. Таксама падрыхтаваў адпаведную прыкормку для ліна з кукурузай ды кавалкамі чарвякоў.
Закарміў і стаў чакаць начнога госця.
Госць завітаў апоўначы, выдаў прыгожую паклеўку і шыкоўную барацьбу, але быў паспяхова дастаўлены на бераг.
Рыбалку ўжо можна было лічыць выніковай, мэтавая рыба злоўлена. Але гэта быў толькі пачатак. Да світанку было яшчэ дзве ліновыя паклеўкі, аднаго залатога прыгажуна спусціў, другога, трохі меншага, узяў. Пасля світанку таксама двойчы падыходзілі ліны, але маленькія.
А калі мы ўжо пачыналі збірацца дахаты, атрымалі яшчэ дзве ліновыя паклеўкі на фідар. Нечакана, але ад гэтага не менш прыемна, тым больш што памер рыбы быў здавальняючы.
А 9 гадзіне скончылі лавіць, прытаміліся, ды і працоўны дзень ніхто не адмяняў.
Вынікі рыбалкі на фота.
Вялікі дзякуй, Вяча!

Объявление

Водохранилище Вяча (Минский р-н)

Водохранилище Вяча (Минский р-н)

Комментарий

Комментарий

Комментарий

Просматривают:

Кто рыбачит